На прагот сме на летото, каде ни престојат исклучително топли денови пропратени со високи температури. Летните горештини можат навистина да бидат штетни по здравјето на кучињатa, особено бездомните кои се постојано изложени на надворешни влијанија, па неретко се случува да бидат дехидрирани, што може да резултира со несакани последици како срцев удар и хипертермија. Влијанието на високите температури не ги исклучува и домашните миленици за кои треба да водиме подеднакво грижа за време на летниот период.

ЈП ЛАЈКА СОВЕТУВА:

При прошетка препорачливо е и да си понесете шише со вода кое од време на време би го употребувале за да го разладите кучето или пак да му дадете вода за пиење. Секогаш давајте му свежа вода;

Обезбедете му соодветно место, заштитено од сонцето доколку престојува на отворен простор;

Никогаш не го оставајте вашиот миленик внатре во затворено возило , па дури и кога се работи за денови со ниски температури;

Избегнувајте да го шетате кучето по асфалт, тоа може да доведе до изгоретини на шепите на вашиот миленик;

Во случај на топлотен удар миленикот треба веднаш да се тргне под сенка или во проветрена просторија. Се лади со вода по главата, вратот и стомакот. По оваа постапка неопходен е преглед од ветеринар за утврдување на евентуалните пореметувања кои можат да настанат како резултат на хипертермијата. Милениците со умерена хипертермија најчесто се опоравуваат без последици по нивното здравје.

Како и луѓето, така и кучињата сакаат да уживаат во летниот период, сонцето и времето поминато на отворено, но сепак важно е да се има на ум грижата за овие шепасти пријатели во овој најтопол период од годината, бидејќи екстремно високите температури знаат да бидат критични за благосостојбата и здравјето за кучињата.