УСПЕШНА ИНТЕРВЕНЦИЈА НА ПОВРЕДЕНО КУЧЕ НА ЗАЛОВУВАЧКИОТ ТИМ НА ЈП ЛАЈКА ВО СОРАБОТКА СО КАНЕ КОРЗО
По добиена пријава од страна на граѓани на социјалните мрежи за повредено куче, денес заловувачкиот тим на ЈП Лајка веднаш се упати на точната локација во близина на техноцентарот Алфи, во скопската населба Автокоманда, каде оваа млада женка била забележана со тешка повреда и крв на главата.
По многубројни обиди да се залови оваа прилично дива женка, благодарение на трудот и упорноста на заловувачите, заловувачката мисија е успешно завршена.
Кучето е преземено од страна на Граѓанска иницијатива „Кане Корзо“ – Civic Initiative #kanekorzomk за понатамошен третман и лекување, бидејќи ЈП Лајка не може да му пружи соодветна грижа за ваква тешка повреда, а не може да не излезе во пресрет кога станува збор за пријава од граѓани за куче во ваква состојба. Им благодариме што ќе биде под нивна понатамошна грижа.
Би сакале да ги замолиме сите хумани граѓани кои сакаат да помогнат во понатамошното лекување и третман за ова куче, да се обратат до здружението Кане Корзо.
